Nakşa Beyine ve Kadısına ve Bare Kadısına Hükm
Ma'lûm ola ki Venedik baylosu dergâh-ı mu'allâ'ma arz-ı-hâl sunub hâric-i Nakşada vâki' Anunhaya? (Anonciata) dimekle ma'rûf kilise ve manastırı altmış seneden beri ve Çokolanti (Fratti Zoccolanti) dimekle meşhûr olan râhibler zabt idegelub ahar râhiblerin medhal ve 'alâkaları yoğ iken hâla Kapuçin (capuchin) dimekle ma'rûf olan râhipler cebren bunları zikr olunan manastırdan çıkarub kiliselerini ve manastırlarını kendileri zabt eylemeğe murâd idmekle hilâf-ı şer'-i şerîf rencide eylediklerin bildirub men' olunmak içun emr-i şerîfim virmek bâbında 'inâyet ricâ etmeğin men' edin? emir idub buyurdum ki
Vusûl buldukdan husûs-ı mezbur hakk üzere tef[t]îş ve tefahhus idub göresiz mezkûrden Kapuçin râhibleri ol vechle te'adi eyledikleri vâki' ise men' ü def' idüb zikr olunan kilise ve manastırı ? Çokolanti râhiblerinin ellerinde ibkā idub kadîmden olageldiği üzere zabt u tasarruf etdiresin şöyle ki mezkûr kanâ'at etmeyub âhâli-i memleketden bağzı kimesnelere istinâd eylemekle mezbûrleri manastırdan çıkarmak isteyub te'adi iderlerse olmakuleleri dahi men' ve def' eyleyesin eğer mezkûrden Kapuçin rahibleri bu yüzden bir tarîkle emr-i şerîf alub bunları ta'cîz ve tazyik iderlerse ol emri teh'îr koyub işbu emr-i şerîfim mûcebince amel eyleyesin eyyâm-ı 'adâlet encamında şer'i şerifim ve kadimden olıgelene muhâlif kimesne ye zulm ve te'adi olunduğuna rızâ-i şerifim yokdur bunlara te'adi idenler ve âhâli-i memleketden mezkurden Kapuçin râhiblerine mu'ayyen ve zahîr olanlar memnu' olmazlar ise olmakulelerden muhtâc-ı arz olanları yazub arz edub olmayanların şer'le haklarından lazım geleni icrâ eyleyesin şer'i ve kānûn ve kadîmden olıgelene muhâlif ve emr-i şerîfime mugāyir kimesneye iş etdirmeyesiz şöyle ki bilesiz ve ba'de'n-nazar bu hükm-i şerîfimi ellerinde ibkā idub.

Tahrîren fî-evâsit şehr-i Recebi'l-mürecceb li-sene tis'a ve selâsîn ve elf

Mahruse-i Konstantiniyye