Sabıkân Tunus Beylerbeyisi olub hâlâ ber-vech-i arpalık Mora sancağına mutasarrıf olan [space left empty] ve Mora ve Avlonya sancaklarında vâki' olan kâdılara ve livâ-i mezbûrede leb-i deryâda vâki olan kılâ' dizdârlarına hükm
Ma'lum ola ki Venedik baylosu dergâh-ı mu'allâ'ma arz-ı-hal sunub mâ-tekaddemden livâ-i mezbûre âhâlisinin kendu mühimmâtlarından artub ziyâde kalan terekelerin yalılara indirub füruht eylemek icab eyledikde mâ-beynde olan dostluğa binâen akçeleri ile Venediklu Beyin rencber tâifesine virilub harbî kefereye virilmeye deyu müt'addid evâmir-i şerîf virilub defâ'atle tenbîh ve te'kîd olunmuş iken hâlâ Avlonya kal'ası ağası 'Ali ağa ve Avlonyada sakin bağzı kimesneler livâ-i mezbûrede hâsıl olan terekeyi evâmir-i şerîfine muhâlif ve Devlet-i 'Aliyenin düşmanı olan Malta ve Ligurie gemilerine virdiklerinden gayrı Venedik re'ayâsı kâr u kesb içün ol semtlere vardıklarında her birine nece te'adi ve tecâvüz idub hatta Venedik kadırgaları ol yalılara geçerken ka'ladan üzerine tob atub ve karaya çıkan iki nefer adamların alıkoyub envâ'i te'addî eylemekle vech-i meşrûh üzere olmakule âhâli-i memleketin mühimmâtlarından artub ziyâde kalan tereke harbî kefereye virilmeyub kadîmden olıgeldiği üzere akçeleri ile Venediklulere virilub ve alıykoydukları iki neferi Venediklular kadırgaları kapudanını her bir mülk için emr-i şerîfim ricâ itmeğin buyurdum ki vusûl buldukda husûs-ı mezbûre her biriniz gereği mukayyed olun dahi âhâli-i memleketin mühimmâtlarından artub ziyâde kalan terekeyi harbî kefere taifesine virdirmeyub kadîmden olugeldiğu gibi narh-ı rûzî üzere akçeleriyle Venediklulere virduresiz harbî kefere tâifesine tereke virilduğine ka'tan rızâ-i şerîfim yokdur şöyle ki mezbûrlar memnû' olmayub geru harbî kefereye tereke virenler olmakuleleri men' ü def' idüb memnu' olmıyanlar muhtâc-ı arz olanlardan ise ism ü resmleri ile yazub arz idub olmıyanların muhkem haklarından gelesiz ki sâ'irlere mûceb 'ibret ve sebeb-i nasihat vâki' ola ve ol alıkodukları iki neferin Venedikluları dahi kimin elinde bulunur ise ve kanda ise buludurub getürdüb kapudanlarına teslîm edesiz ve dâimâ ol yalılarda kâr u kesb içün varan Venedikluları zulme ve ehl-i fesâdden gereği gibi himâyet ve sıyânet eyleyub kadırgaları kapudanları ile ve sair hâkim ve zâbıtları ile hüsn-ü sülûk ve muhabbet üzere geçinüb sulh ü salâhın istihkâmına ve ahd ü emânın istikrârına sa'y ü ihtimâm eyleyesiz şöyle bilesiz ve ba'de'n-nazar bu hükm-ü şerîfi sicil-i mahfûz kayd idub Venediklulerin ellerinde ibkā idub ilâmat-ı şerîfe i'timâd kılasız
Tahrîren fî Evasıt şehr-i ramazân el-mübârek sene sitte ve erba'în ve elf
Be-makam-ı Konstantiniyye el-Mahrûse