Akza kuzati'l-müslimin evla vülati'l-muvahhidin ma'denü'l-fazlı ve'l-yakin hüccetü'l-hakk-ı'ale'l-halk-ı ecma'in varisu ulumi'lenbiya ve'l-mürselin el-muhtassu bi-mezidi inayeti'l-meliki'l-muin Mevlana İstanbul kadısı zidet fazluhu tevki'-i ref'-i hümayun vasıl olacak malum ola ki Venedik balyosu bab-ı sa'adet-daime arz-u hal gönderüb mahrusa-i İstanbul'da Edirne Kapu karibinde Kefeli cema'ati mahallesinde feth-i hakaniden berü sakin olub kiliselerinde kendü ayinleri üzere 'ibadet iden Efrenç taifesine hala ba'zı müslümanlar garazan dahl idüb ibadet iyledükleri kiliselerinde ve bağçelerinde almak ve zülm ve hayf itmek isterler selatin maziye zamanlarından berü kadimi kiliselerinde ibadet-i Efrenç taifesinin rencde olunmayub ve kiliselerine ve yerlerine ve bağçe şerine şer'-i şerife muhalif dahl ve ta'arruz olmamak rica eyledükleri paye-i serire ilam-ı arz olundukda virilsün deyü hatt-ı hümayun-sa'adet makrunumla ferman-ı al-i şan'ım sadır olunmağın buyurdum ki hükm-ü şerifim vardukda göresün mahall-i mezburede sakin Efrenç taifesinin kadimden ibadet idegeldükleri kiliselerine ba'zı müslümanlar garazen dahl ve taarruz idüb hilaf-ı şer'-i şerif bağçelerin alub zülm ve te'addi itmek isterse men'ü def' idüb min ba'ad zikr olunan kadimi kiliselerine şer'-i şerife ve hatt-ı hümayunuma muhalif dahl ve taarruz itdürmeyüb kiliselerinin yerlerine ve bağçelerine dahi şer'ü şerife mugayyir dahl itdürmeyesün şöyle bilesün ve ba'dü'n-nazar bu hükm-ü hümayunumu ellerinde emin idüb alamet-i şerife 'itimad kılasun tahriren fi evasıt-ı şehr-i ramazanü'l-münbarek sene selase ve 'aşar ve elf. Bimakam-ı Konstantiniyye